– కోదండకు ఉన్మాదం; టిఆర్‌ఎస్‌ వ్యతిరేకి, పూర్తి విషపూరితమైన వ్యక్తి. అతడు చాలా చిన్నవాడు. పట్టించుకోనక్కరలేదు. నాది తెలంగాణ కులం. విపక్షానికి మెంటల్‌. కాంగ్రెస్‌ క్షమాపణ చెప్పాలి.
– సీఎం కేసీఆర్‌
– సీఎం గారూ ! మీ కౌంటర్‌ను ఎన్‌కౌంటర్‌ చేయలేక విపక్షాలు కుయ్యో మొర్రో అంటున్నాయి ! ఆపండి ప్లీజ్‌ !
– నేనెవరో తెలియదట సంతోషం ! అశోక గజపతిరాజు గారికి పవన్‌ కల్యాణ్‌ ఎవరో తెలియదు. మంత్రి పితాని గారికి పవన్‌ కల్యాణ్‌ ఏంటో తెలియదు సంతోషం!
– జనసేన అధినేత పవన్‌ కల్యాణ్‌
– మరి మీరేమో గబ్బర్‌సింగ్‌లా ఉద్దాన్‌ కిడ్నీలు, అగ్రిగోల్డ్‌ బాధితులు అంటూ వాళ్ళ వెంబడి తిరుగుతుంటే రాజకీయాలు మానేశారు అనుకున్నారేమో ! ఇదేమన్న ‘అత్తవారింటికి దారేదీ సినిమానా !? నీవు మెయిన్‌ రోల్‌ పోషించడానికి!?
– ఎన్నికల హామీలు తుంగలో తొక్కి తెలంగాణలో అప్రజాస్వామిక పాలన సాగిస్తూన్న సీఎం కేసీఆర్‌ నోరు మాట్లాడుతుంది. నొసలు వెక్కిరిస్తుంది.
– సీపిఐ నేత నారాయణ
– కేసీఆర్‌ ఇంగేం జెయ్యాలె నారన్నా! అక్కడ మోది బాలేడు అంటారు. ఇక్కడ కేసీఆర్‌ బాలేడంటారు !? మరి మీరు డెబ్బై ఏళ్ళ నుండి పల్లకీ మోసిన కాంగ్రెస్‌ పాలన ఏమైన గుప్తుల పాలనా ! లేక రాయల పాలనా! తమరి సోదర పార్టీ అయిన సిపియం బెంగాల్‌లో, కేరళలో నిర్దాక్షిణ్యంగా కొనసాగిస్తున్న హత్యలు దుర్మార్గం కాక మరేమిటి? అక్కడేదో ‘రామరాజ్యం’ ఉన్నట్లు, ఇతర రాష్ట్రాల్లో రాక్షస రాజ్యం ఉన్నట్లా? ఎందుకా బిల్డప్‌?
– అప్పట్లో నాతో మాట్లాడే శక్తి సత్తా ఆయనకు లేవు. తెలంగాణ రాష్ట్రాన్ని ఏ ఒక్కరో తేలేదు. కేసీఆర్‌ను నమ్మీ మోసపోయం.
– కాంగ్రెస్‌ నేత జానారెడ్డి
– ‘మా తాతలు నేతులు తాగారు; మా మూతులు వాసన చూడమనడం అంటే ఇదే !
– కేసీఆర్‌ ఓ దగుల్బాజీ ! మోహం చెల్లక కోదండను తిట్టావ్‌ ! ఓ.యూ త్యాగాలతోనే తెలంగాణాలో కదలిక!
– తెదేపా నేత రేవంత్‌రెడ్డి
– ‘తెలుగు రాజకీయాల్లో తిట్టు కవిత్వం’ అన్న అంశంపై ఎవరైనా పరిశోధన చేస్తే ఏ రెఫరెన్సులు అక్కర్లేదు. మీ దండకాలు సరిపోతాయి!
– తెలంగాణ పాలన ఒక కుటుంబం పాలైంది. జవాబు చెప్పలేక దూషణలు.
– జేఏసీ నేత కోదండరాం
– మిమ్మల్ని జేఏసీ నాయకుణ్ణి చేసినపుడు ఇవన్నీ గుర్తులేవా !
– పదిమంది ట్రంప్‌లొచ్చినా ఏం చేయలేరు.
– అణు ఒప్పందంపై ఇరాన్‌ అధ్యక్షుడు రేహాని
– సద్దాంహుస్సేన్‌ కూడా ఇలాగే అన్నాడు రేహానీసాబ్‌
– భాజపా, ఆర్‌.ఎస్‌.ఎస్‌.లది అసత్య ప్రచారం. కేరళలో వాళ్ళే దాడులు చేస్తున్నారు.
– సీపిఎం నేత తమ్మినేని వీరభద్రం
– అంటే మీరు శాంతిభద్రతల సమస్యను పరిష్కరించలేరా తమ్మినేని ! స్వతంత్ర సంస్థలతో దర్యాప్తు చేయించండి. పోలీసులు, గుండాలు మీ చేతిలో లేరా! వాళ్ళెవరూ దాడుల్లో మరణించలేదా! గురివింద సిగ్గుపడగలదు జాగ్రత్త !
కామెంట్‌లు లేవు:
కామెంట్‌ను పోస్ట్ చేయండి